kyon??

Thartharaate hont, dagmag kadam, panili aankh hai,

aaj phir chhootane lagi hai kalam haath se kyon?

Sookhi nahi thi pichhale pannon ki syaahi,

rukti nahi aawaaraa shabdon ki aavaajaahi,

charmaraate kivaadon se woh barbas ghuse aate,

aur tooti hui khidki se dabe panv nikal gaye kyon?

...................kalam haath se kyon?

Rojandaari ki kadi mehanat se sooraj bahut thak gayaa,

chaand bhi naukri par aane se pahale hi bhatak gayaa,

bojhil andheri raat ka wazan uthaane se katraate hue,

kuchh beemaar taare bhi, chupchaap chhitar gaye kyon?

...................kalam haath se kyon?

railgaadi ki tarah khadkhadaataa dil, thaharne lagaa hai,

patariyon par break ki tarah, cheekhkar bund hone lagaa hai,

station pahunchane ki aas men, outer par hi padaa rah gayaa,

zindagi ki hariyaali ke signal, achaanak laal ho gaye kyon?

..................kalam haath se kyon?

Shaayad bahare kaano men mere, kisi ki taan pad jaaye,

shaayad kisi saaz ki aawaaz, dil tak mere pahunch jaaye,

shaayad kisi kaa geet mere honton se phir se mil jaaye,

bedum meri aas pe, woh phir ek baar huns pade kyon?

...................kalam haath se kyon?

Rojandaari- daily wages;